గమ్యం తెలియని, దారి లేని ఒక ప్రయాణం పరిశోధన. ఊహాజనిత గమ్యానికి దారుల్ని ఏర్పరచి, ఆ దారిలో ఉన్న పరిమళాల్ని హత్తుకొని, అడొచ్చిన కంటకాల్ని ఏరేస్తే చివరికి దొరికే అమృత ఫలమే పరిశోధన. పరిశోధన అంటేనే ఒక క్షీరసాగర మథనం. ఎన్నో విధాల పరిశీలన, ఎన్నోరకాల విశ్లేషణ, ఎన్నో రోజుల అన్వేషణ, మరెన్నో సంవత్సరాల నిరీక్షణ. వెరసి ఆ ఆలోచనామృతం సిద్ధాంత వ్యాసంగా మారుతుంది. ఒక చిన్న ఆలోచన అతి పెద్ద సిద్ధాంతంగా రూపుదిద్దుకునే క్రమంలో ఎన్ని సందేహాలు ఉద్భవిస్తాయో అన్ని సలహాలూ పలకరిస్తాయి. చివరికి పరిశోధకులు తమకు అందిన తీరాన్నో, కావలసిన తీరాన్నో చేరుకుంటారు. దానివలన డిగ్రీలు రావచ్చు. అవార్డులూ వరించవచ్చు. ఏది ఏమైనా పరిశోధన అంటేనే ఒక మహా ప్రయాణం. మన చుట్టూ ఎన్నో పరిశోధనలు. ఎన్నెన్నో ఆవిష్కరణలు. వాటన్నిటి గురించి అందరం చదివి తెలుసుకోవాలంటే వేల గంటలు ఖర్చు చేయాలి. కానీ అతి తక్కువ సమయంలో ఒక పరిశోధన గురించి మనం తెలుసుకోవాలంటే అది పరిశోధకుల మాటల్లోనే సాధ్యం. అందువలన పరిశోధనా ప్రస్థానాన్ని, ఆ ఫలితాన్ని, ఆ అనుభవాల్ని పంచుకోడానికి, పెంచుకోడానికి ఒక వేదిక ఉంటే బాగుంటుందని, పరిశోధనల సారాంశాన్ని పరిశోధకుల మాటల్లోనే వినగలిగితే ఇంకా బాగుంటుందనే ఆలోచనతో రూపుదిద్దుకున్న ప్రయాణమిది.