ప్రపంచీకరణ నేపథ్యంలో తెలుగు భాషా వికాసం అనే ఈ కార్యక్రమంలో కళాశాల అధ్యక్షులు డాక్టర్ సిహెచ్ మస్తానయ్య గారు,విశిష్ట అతిధిగా ఉన్నత విద్యాశాఖ సంయుక్త సంచాలకులు డా.వి.పాపయ్య శాస్త్రి గారు, ముఖ్య అతిధిగా ప్రాచీన తెలుగు విశిష్ట అధ్యయన కేంద్రం సంచాలకులు ఆచార్య డి.మునిరత్నం నాయుడుగారు పాల్గొన్నారు. గూగుల్ మీట్ యాప్ మాధ్యమంగా జరిగిన ఈ కార్యక్రమంలో కళాశాల ప్రిన్సిపల్ డా సిహెచ్. మస్తానయ్య గారు మాట్లాడుతూ చిన్నతనంలో నేర్చుకున్న పద్యం ఇప్పటికీ గుర్తుండడానికి కారణం పద్యపఠనా విధానమేనని తెలియజేసారు. డా.వి.పాపయ్య శాస్త్రి గారు మాట్లాడుతూ జీవితం వేగవంతమైనది ఏ కాలంలోనైనా సమాజమే సాహిత్యంలో ప్రతిబింబిస్తుందని, తెలుగు సాహిత్యం మీద ఆంగ్ల సాహిత్య ప్రభావం ఎక్కువగా ఉందని చెప్పారు. ఆచార్య మునిరత్నం నాయుడు గారు మాట్లాడుతూ తెలుగేతర ప్రాంతాల్లో ఉన్న తెలుగువారు తెలుగు రాష్ట్రాల్లో ఉన్న తెలుగు వారికన్నా తెలుగు భాషా సాహిత్యాల వికాసం కోసం ఎక్కువ కృషి చేస్తున్నారని దాని గురించి వివరించారు. తెలుగు ప్రాంతాలకు సరిహద్దు రాష్ట్రాలైన తమిళనాడు, కర్ణాటక మహారాష్ట్ర ఒరిస్సాలతో పాటు ఉత్తర భారతంలోని గుజరాత్, హర్యానా, మధ్యప్రదేశ్, ఛత్తీస్ ఘడ్, అస్సాం రాష్ట్రాలలో జరుగుతున్న తెలుగు భాషా బోధన గురించి, జెరూసెలెమ్, మారిషస్, మలేషియా, అమెరికా, ఆస్ట్రేలియా, ఇంగ్లాండ్ లో జరుగుతున్న తెలుగు భాషా వికాసం, వాటిని నిర్వహిస్తున్న సంస్థల  గురించి వివరించారు. అమెరికాలో ఒక్క సిలికానాంధ్ర ఆధ్వర్యంలో 'మన బడి' పేరు మీద శాఖలు ఉన్నాయని, అందులో రెండు వేల మంది స్వచ్చంద బోధకులు దాదాపు 55 వేల మంది విద్యార్థులకు తెలుగు నేర్పిస్తున్నట్లుగా తెలియజేశారు. అంతేకాక మారిషస్లో మహాత్మా గాంధీ విశ్వవిద్యాలయం తెలుగును ప్రధానంగా బోధిస్తుందని తెలియజేశారు. ప్రత్యేకించి దేశ రాజధాని ఢిల్లీలో ఆంధ్ర ఎడ్యుకేషన్ సొసైటీలో చదువుతున్న పది  వేల మందికి పైగా హిందీ భాషా వ్యవహర్తల కోసం 1 నుండి 8వ తరగతి వరకు తెలుగు వాచకాలు, ఇంకా కేంద్ర ప్రభుత్వం ఆధ్వర్యంలో నడుస్తున్న నవోదయ విద్యాలయ సమితి కోసం ఆరవ తరగతి నుండి పదవ తరగతి వరకు తెలుగు వాచకాలను మండలి వెంకట కృష్ణారావు అంతర్జాతీయ తెలుగు కేంద్రం డైరెక్టర్ హోదాలో తాను తీసుకురావడం జరిగిందని వివరించారు. దీంతో పాటు ఇటీవల ఉపరాష్ట్రపతి శ్రీ వెంకయ్య నాయుడు గారి చొరవతో నెల్లూరుకు తరలి వచ్చిన ప్రాచీన విశిష్ట తెలుగు అధ్యయన కేంద్రం డైరెక్టర్ గా అక్కడ జరుగుతున్న అనేకానేక తెలుగు భాషా వికాస కార్యక్రమాల గురించి వీరు ఈ సదస్సులో వివరించారు. కార్యక్రమానంతరం శ్రోతలు అడిగిన అనేక సందేహాలకు వారి వివరణ ఇచ్చారు. తెలుగు శాఖ సహాయ ఆచార్యులు డా.కరుణశ్రీ మాట్లాడుతూ ప్రపంచీకరణ నేపథ్యంలో తెలుగు వాడు ఎదిగినంతగా తెలుగు భాష ఎదగ లేదన్నారు. ఈ కార్యక్రమంలో కళాశాల తెలుగు శాఖలోని ఇతర సహాయ ఆచార్యులు దాక్టరు దివిజాదేవి, డాక్టర్ పద్మ ప్రియ గార్లు పాల్గొన్నారు