దొడ్ల కౌసల్యమ్మ ప్రభుత్వ మహిళా కళాశాల 1964 జూన్ 27వ తేదీ దొడ్ల సుబ్బారెడ్డి దాతృత్వ గుణంతో ఆయన సతీమణి పేరు మీదుగా నెల్లూరు నగర నడిబొడ్డున నిర్మించబడింది. ఈ కళాశాల నెల్లూరు జిల్లా మహిళలకే కాక ఇతర జిల్లాల మహిళలకూ విద్యనందించి వారిని సర్వతోముఖులుగా తీర్చిదిద్ది రాష్ట్రంలో తనకంటూ ఒక ప్రత్యేక స్థానాన్ని సంపాదించుకుంది. డి.కె. ప్రభుత్వ మహిళా కళాశాల స్వయం ప్రతిపత్తి హోదాతో పాటు కాలేజ్ విత్ పొటెన్షియల్ ఫర్ ఎక్స్లెన్స్ ను సాధించి అగ్రగామిగా పయనిస్తోంది. ఈ కళాశాల అటు విద్యలో, ఇటు పరిశోధనా రంగంలో దినదిన ప్రవర్ధమానం అవుతూ ఇతర కళాశాలలకు మార్గదర్శకంగా ఉంది. ఈ కళాశాలలో తెలుగు అధ్యయన శాఖ కూడా కళాశాల స్థాపించిన నాటి నుంచి ఏర్పడి తెలుగు భాషాభివృద్ధికి తోడ్పడుతూ విద్యార్థుల సాహితీ తృష్ణ తీరుస్తూ వారిని ఉపాధి దిశగా నడిపిస్తోంది. అలాంటి తెలుగు శాఖ ఇప్పుడు తెలుగు సాహిత్యంలో చర్చించవలసిన అనేక అంశాలను అందరితో పంచుకోడానికి దొడ్ల కౌసల్యమ్మ పేరు మీదుగా సాహితీ 'కౌసల్యం' అన్న సాహిత్య వేదిక ద్వారా సహృదయుల సౌజన్యంతో మీ ముందుకు వస్తోంది. ఈ కార్యక్రమం విజయవంతం కావాలని భావిస్తూ క్రింది లంకెలో నమోదు చేయవలసినదిగా కోరుతున్నాను.